Omina Shenliko'g'li - Imomning maneken qizi

Imomning maneken qizi (1-qism) Yoshlik keksalikning ko'zgusidir. Ko'zgudagi aksdan rozi bo'lmagan kishi, ko'zgudan emas o'zidan hisob so'rashi lozim. Tomdagi qorlar erib, uy ichiga tomchilab, hamma yoqni xo'l qilgandi. Xonadonning qizi Fotima chakka o'tayotgan erlarga idishlarni qo'yar, ham tinmay nolirdi. - To'yib ketdim axir, to'yib ketdim. Oyi, meni eshityapsizmi? Eringizga ayting bizni tuzukroq uyga joylashtirsin endi. Fotima butun kin va nafrati bilan nolishda davom etardi. - Uyimizdan uyaladigan bo'lib qolganman. Hatto o'rtoqlarimni ham taklif etolmayman. Ikki xonasi va zali bo'lgan masjid yotoqxonasida onasi doim shu so'zlarni eshitardi. Jig'arbandining bu gaplaridan qattiq ranjir va - Qizim, bolajonim, shunga ham shukur qilishimiz kerak. Boshpanasiyam bo'lmaganlar bor. Dadang yaqinda kelib qoladi. Oxirgi rakatni o'qishayotgan bo'lishsa kerak. Ovozing masjidga eshitilishi mumkin, sal sekinroq gapir, - derdi. Fotima suv bilan to'lgan idishlarni bo'shatar ekan, yanayam jahl bilan gapirdi: - Har doim bitta gap. Dadang eshitadi, dadang eshitadi. Eshitsin. Kim eshitsa eshitsin. Boshqa chidolmayman. Nima dadam meni so'rab olibdimi? Yoki siz meni so'rab tuqqanmidingiz? Ichimdan boshqa gaplar ham kelyapti-yu, lekin Tavba, tavba. Bunday hayotga boshqa bardosh berolmayman deb necha marotaba aytdim. Bardosh berolmayman. Bu dunyoga kelayotganimda mendan hech kim so'ramagandi. - Qizim sen aqlingni eb qo'yibsan. Alloh o'z asarini yaratarkan, nega sendan so'rasin. Sen manavi gullarni boqqa ekishingdan avval, ulardan so'raganmisan, balki ular ham bu dunyoda yashashni xohlashmas. Manavi kursini u joydan bu joyga olayotganingda kursidan so'raganmisan? Balki u ham u yerni xohlamas. Sen uchun boqqa ekkan guling qanday bo'lsa, Alloh uchun sen ham shundaysan. Mushtipar ona xo'l bo'lib ketgan polni latta bilan artib, suvini chelakka siqarkan, ...