Odam savdosi

Reja: Odam savdosi qullik balosi. Odam savdosiga qarshi kurashish. Odamlardan foydalanish. Odam savdosi - umumiy obyektiga ko'ra, shaxsning ozodligi, sha'ni va qadr-qimmatiga qarshi qaratilgan jinoyatlardan biri bo'lib, xalqaro uyushgan jinoyatchilikning tarkibiy qismi hisoblanadi. Odam savdosi, ayniqsa, nihoyatda serdaromad faoliyat turi sifatida barchani e'tiborini jalb qilmoqda. Agar statistik ma'lumotlarga nazar tashlaydigan bo'lsak, klassik quldorlik xukm surgan to'rt asr davomida uning savdo aylanmasida 12 millionga yaqin odam bo'lsa, so'nggi 30 yil ichida birgina Osiyoda jinsiy qullikka mahkum etilgan ayollar va bolalar soni 30 milliondan ortiqni tashkil etdi. Ushbu qilmish tufayli olinayotgan daromad giyohvandlik vositalari va qurol-yarog' savdosidan keyin uchinchi o'rinni egallaydi. Birlashgan Millatlar tashkilotining ma'lumotlarga ko'ra, har yili 600 mingdan 800 minggacha ayollar va bolalar aldov yo'llari bilan chet ellarga olib ketilib, sotib yuborilmoqda. Mavjud statistik ma'lumotlarga ko'ra, 2006-2011 yillarda Respublikamizda 5 ming nafardan ortiq shaxs odam savdosi bilan bog'liq jinoyatlardan jabrlangan. Ularning 4 ming 197 nafarini erkaklar, 1102 nafarini ayollar, 182 nafarini voyaga yetmaganlar tashkil etgan. O'zbekiston Respublikasi Ichki ishlar vazirligi ma'lumotlariga ko'ra, bunday jinoyat jabrlanuvchilarning, ayniqsa, shahvoniy maqsadlarda ekspluatatsiya qilinayotgan ayollarni aksariyat qismi, ya'ni 78 foizini 16-25 yoshdagi ayollar tashkil etar ekan. Yuqorida keltirilgan raqamlardan kuzatishimiz mumkinki, bugungi kunda odam savdosi ijtimoiy xavfliligi jihatidan kun sayin o'sib borayotgan jinoyatlardan biri bo'lib, unga qarshi milliy va xalqaro miqyosda kurashni kuchaytirish, bunday qilmishlarni oldini olishda zarur dasturlarni ishlab chiqish hamda mazkur muammoga qarshi kurashishning huquqiy asoslarini yanada mustahkamlash lozimligini davrning o'zi talab qilmoqda. Shu maqsadda 2008 yil 17 aprelda qabul qilingan O'zbekiston Respublikasining Odam savdosiga qarshi kurashish to'g'risidagi Qonuni odam savdosiga qarshi kurashish sohasidagi munosabatlarni tartibga soladi, shuningdek odam savdosiga qarshi kurashishni tashkil etish, odam savdosidan jabrlanganlarni himoya qilish va ularga yordam ko'rsatish, odam savdosiga qarshi kurashish sohasida xalqaro hamkorlik, bu sohadagi qonun hujjatlarini buzganlik uchun javobgarlik kabi masalalarni ham qamrab oladi. Shuningdek, mazkur qonunga muvofiq hamda odam savdosiga qarshi kurashish faoliyatini takomillashtirish maqsadida 2008 yil 8 iyulda O'zbekiston Respublikasi Prezidentining Odam savdosiga qarshi kurashish samaradorligini oshirish bo'yicha chora-tadbirlar to'g'risidagi Qarori qabul qilindi. Mazkur qarorda 2008-2010 yillarda odam savdosiga qarshi kurashish samaradorligini oshirish bo'yicha Milliy tadbirlar rejasi hamda odam savdosiga qarshi kurashish bo'yicha Respublika idoralararo komissiya to'g'risidagi Nizom tasdiqlanishi belgilab qo'yildi. Respublika idoralararo komissiyasining asosiy vazifalari esa, quyidagilardan iborat qilib belgilandi. odam savdosiga qarshi kurashish sohasida davlat organlari, fuqarolarining o'zini-o'zi boshqarish organlari va nodavlat notijorat tashkilotlari faoliyati muvofiqlashtirish. odam savdosiga imkoniyat yaratuvchi sabablar va shart-sharoitlarni aniqlash hamda bartaraf etish ishlari samaradorligini oshirishga qaratilgan tadbirlarni tashkil qilish. odam savdosi ko'lami, holati tendensiyalari to'g'risida ...