Osiyo yo'lbarslaridan biri Malayziya

Malayziya o'z iqtisodiy ko'rsatkichlari bo'yicha Osiyo yo'lbarslari nomi bilan mashhur yangi sanoatlashgan davlatlar sirasiga kiradi. Xorijiy kapital va texnologiyalarni keng jalb etish, sanoatlashgan davlatlar ilg'or tajribasidan foydalanish, import o'rnini bosuvchi eksportbop mahsulotlar ishlab chiqarish, yuqori darajadagi siyosiy barqarorlik, iqtisodiyotni modernizatsiyalash yangi yutuqlarni qo'lga kiritishda muhim omil bo'lmoqda. Osiyo yo'lbarslari dan biri Malayziya haqida Ayni iqtisodiy jarayonlar davlat tomonidan ishlab chiqilgan aniq reja asosida izga solinib turibdi. Vaholanki, Janubi-Sharqiy Osiyodagi 24 mln. kishilik aholiga ega bo'lgan ushbu mamlakat 1957 yilgacha, ya'ni milliy mustaqillikkacha, asosan kauchuk va qalay ishlab chiqarish hamda eksport qilishga ixtisoslashgan qoloq bir mamlakat sanalardi. O'tgan yuz yillikning 60-yillaridanoq, hukumat bir maromdagi o'sish strategiyasini belgilab oldi. Bundan maqsad, iqtisodiyotni diversifikatsiyalash va sanoatlashtirishdan iborat edi. Asosiy e'tibor import o'rnini bosuvchi oddiy iste'mol mahsulotlari ishlab chiqarishga qaratildi. Aholini asosiy oziq-ovqat mahsulotlari bilan ta'minlash va kichik fermer xo'jaliklarini zamonaviylashtirish qishloq xo'jaligi sohasidagi muhim vazifalardan biri qilib qo'yildi. Sarmoyalarni rag'batlantirish haqidagi akt (1968 yil) qabul qilinganidan keyingina, eksport masalasi kun tartibiga qo'yildi. 1971 yili mamlakatda Yangi iqtisodiy siyosatni amalga oshirishga kirishildi. Bu siyosat zamirida aholi o'rtasidagi qashshoqlikni kamaytirish va kuchli ijtimoiy himoya masalasi yotar edi. Ayni davr, shuningdek, davlatning iqtisodiy jarayonlarga faol aralashuvi bilan farqlanadi. Eksportga yo'naltirilgan sanoat strategiyasini amalga oshirish jarayonida investorlar va eksportchilar uchun ko'plab imtiyozlar yaratildi, erkin savdo hududlari tashkil etildi. Xususan, to'qimachilik sanoati va elektronika eksportini rivojlantirishga keng ahamiyat qaratildi. Shu tariqa mamlakat iqtisodiyoti bosqichma-bosqich rivojlana boshladi. 1971-1980 yillarda yalpi ichki mahsulotning o'sishi yiliga o'rtacha 8 foizni tashkil etganligi fikrimiz dalilidir. 1980-1986 yillar mobaynida og'ir sanoat tarmoqlarida import o'rnini bosuvchi mahsulotlar ishlab chiqarishni yo'lga qo'yish ustuvor masalaga aylandi. Biroq dunyo bozoriga xos notekis jarayonlar Malayziya iqtisodiyotiga ham o'z ta'sirini ko'rsatdi. Natijada ma'lum muddat yalpi ichki mahsulotning yillik o'rtacha o'sish sur'ati 4-4,5 foizga tushib qoldi. Shu tariqa islohotlarni chuqurlashtirish, davlatning iqtisodiyotga aralashuvini birmuncha cheklash zarurati yuzaga keldi. Sarmoyalarni rag'batlantirish, sanoatning turli tarmoqlari o'rtasida hamkorlikni kuchaytirish, sog'lom raqobat muhitini shakllantirish choralari ko'rildi Malayziya iqtisodi (yillik) Yillik export va import ...