Sotsial psixologiyada guruhlar va jamoa muammosi

Sotsial psixologiyada guruhlar va jamoa muammosi Reja: 1.Sharq mutafakkirlarining ijodida guruh va jamoa masalalarining o'rganilishi. 2.G'arb psixologiyasida guruh va jamoa muammosi tahlili. 3. Sobiq Ittifoq psixologiyasida guruh va jamoa muammosi tahlili. 4.O'zbekiston psixologiyasida guruh va jamoa muammosining o'rganilishi. Jamoa va guruh, guruhda shaxslararo munosabatlar muammolari Abu Nasr Forobiy, Abu Rayhon Beruniy, Abu Ali Ibn Sino, Amir Terum, Ulug'bek, Yusuf Xos Hojib, Alisher Navoiy, Jaloliddin Davoniy va boshqalarning qo'lyozmalarida keng o'rganilgan. Ular davlat, jamiyat, jamoa, guruh, guruh a'zolari, insonlarning shaxsiy fazilatlari, ularning oldida turadigan murakkab, mas'uliyatli vazifalar, ayrim illatlarning oldini olish va bartaraf qilish yo'l-yo'riqlari bo'yicha ibratli fikrlar bildirilgan. Biz quyidagi buyuk tafakkur egalarining davlat va jamiyat, guruhiy munosabatlarni boshqarish haqidagi qarashlarini tahlil qilamiz. Buyuk mutafakkir Abu Nasr Forobiy yaqin va o'rta sharqda ilg'or ijtimoiy-falsafiy oqimning asoschilaridan bo'lib, Sharq Aristoteli degan unvonga sazovor bo'lgan mashxur shaxsdir. U o'rta asr mutafakkirlaridan birinchi bo'lib jamiyatning kelib chiqishi va davlatni boshqarishning asosi haqidagi bilimlar tizimini ishlab chiqdi hamda bu masalalarni bir qator asarlarida batafsil bayon etib berdi. Abu Nasr Forobiyning jamiyat, davlat, huquq, siyosat, adolat, ta'lim va tarbiya haqidagi traktat g'oyalari qarashlari Baxtga erishish haqidagi traktat, Urush va tinch-totuv yashash haqida, jamiyatni o'rganish haqidagi kitob, Davlat arboblari haqidagi aforizmlar kabi asarlarida o'zining chuqur ifodasini topgan. Muallif o'zining asarlarida jamiyatning kelib chiqishi, davlatning paydo bo'lishi, uning shakllari, davlat rahbarining vazifalari, ular oldiga qo'yilgan asosiy talablar, davlatni idora etish usullari haqida o'zining chuqur falsafiy-siyosiy qarashlarini bayon qiladi. Allomaning fikricha, odamlar o'zlarining moddiy va ma'naviy ehtiyojlarini qondirish uchun turli jamoalarga birlashganlar. U odamlarning jamoasini boshqarishda ijtimoiy adolat prinsiplari, normalariga rioya qilish darkor ekanligini qayta-qayta takrorladi. Jamiyatni boshqarish mehanizmini insonparvarlashtirishda rahbarlar, yo'lboshchilarning roli beqiyos ekanligini har tomonlama isbotlab, jamiyatni boshqaruvchi rahbarlar uchun zarur bo'lgan asosiy fazilatlar, sifatlar va xislatlarni aniqlab berdi. Forobiy shahar davlat rahbarlarining haqiqatgo'y, yolg'onga, adolatsizlikka, zulmga qarshi keskin kurashuvchi, boylikka jirkanib qarovchi, adolatni o'z tabiati bilan sevuvchi, botir va qat'iy bo'lishi zarurligini ta'kidlab o'tadi. U davlatni boshqarishda donolash yordamiga suyanish, ular bilan maslahatlashib ish yuritish, boshqaruv apparatiga ega har tomonlama yetuk dono, halol va kamtarin kishilarni jalb qilishni eng to'g'ri yo'l deb biladi. Abu Nasr Forobiy davlat rahbarining eng zarur fazilatlari sifatida mulohazali bo'lishni, adolatparvarlikni, kamtarlikni, haqiqatni sevishni va eng asosiysi aqllilikni alohida qayd qiladi. Fozil davlat rahbari - o'qituvchi sifatida o'z o'quvchisi - aholiga ilm yordamida baxt-saodatga erishish yo'llarini o'rgatadi. Muallif yuqorida sanab o'tilgan fazilatlarni bir kishida mujassamlashtirish mumkin emasligini tushunib, ana shu fazilat turlarini o'zida mujassamlashtirgan shaxslar birgalashib davlatni idora etishlari zarur, deydi. ...